Zbulimi mund të ofrojë shpresë për pacientët me ME, por ekspertët kërkojnë më shumë studime para se testi të përdoret në praktikë.
Shkencëtarët thonë se kanë zhvilluar testin e parë në botë të gjakut që mund të diagnostikojë encefalomielitin mialgjik, i njohur ndryshe si sindroma e lodhjes kronike (ME/CFS).
Aktualisht, nuk ekziston një test specifik për këtë sëmundje dhe pacientët diagnostikohen kryesisht bazuar në simptomat, çka bën që shumë prej tyre të mbeten pa diagnozë për vite me radhë.
Megjithatë, disa ekspertë që nuk kanë qenë pjesë e kërkimit i kanë bërë thirrje kujdesit, duke theksuar se testi duhet të vërtetohet plotësisht përmes studimeve të pavarura dhe më të gjera, përpara se të përdoret në praktikën klinike.
Prof. Dmitry Pshezhetskiy, nga Fakulteti i Mjekësisë në Universitetin e East Anglia (UEA), tha:
“ME/CFS është një sëmundje serioze dhe shpesh paaftësuese, e karakterizuar nga lodhje ekstreme që nuk lehtësohet as pas pushimit. Disa pacientë raportojnë se janë injoruar ose se u është thënë se sëmundja e tyre është ‘në kokën e tyre’. Pa një test përfundimtar, shumë prej tyre kanë mbetur pa diagnozë ose janë diagnostikuar gabim për vite me radhë. Ne donim të shihnim nëse mund të zhvillonim një test gjaku për të diagnostikuar këtë gjendje dhe ia dolëm.”
Sipas tij, zbulimi ofron mundësinë e një testi të thjeshtë dhe të saktë gjaku për të ndihmuar në konfirmimin e diagnozës, duke lejuar mbështetje dhe trajtim më të hershëm.
Ekipi i shkencëtarëve nga UEA dhe kompania Oxford Biodynamics (OBD) analizoi mënyrën se si paloset ADN-ja te pacientët me ME/CFS — një tregues i mundshëm biologjik i sëmundjes. Ata studiuan mostra gjaku nga 47 pacientë me forma të rënda të ME/CFS dhe 61 persona të shëndetshëm. Studiuesit zbuluan një model unik, që shfaqet vazhdimisht te personat me ME/CFS dhe jo te të shëndetshmit, duke i mundësuar zhvillimin e testit.
Në artikullin e botuar në Journal of Translational Medicine, studiuesit raportuan se testi kishte një ndjeshmëri prej 92% (pra, saktësia në identifikimin e rasteve pozitive) dhe një saktësi specifike prej 98% (aftësia për të përjashtuar rastet negative).
Prof. Pshezhetskiy shtoi:
“Ky është një hap i rëndësishëm përpara për herë të parë kemi një test të thjeshtë gjaku që mund të identifikojë me besueshmëri ME/CFS, duke hapur rrugën për ndryshime në mënyrën se si diagnostikohet dhe trajtohet kjo sëmundje komplekse.”
Prof. Alexandre Akoulitchev, drejtor shkencor i OBD, tha se ky zbulim tregon rëndësinë e përdorimit të markuesve epigjenetikë (EpiSwitch), të cilët mund të ndryshojnë gjatë jetës së një personi, ndryshe nga kodi gjenetik që mbetet i pandryshueshëm.
“Sindroma e lodhjes kronike nuk është një sëmundje gjenetike që trashëgohet, prandaj analizimi i ndryshimeve epigjenetike ishte çelësi për arritjen e këtij niveli të lartë saktësie,” shpjegoi ai.
Megjithatë, disa ekspertë të tjerë kërkuan më shumë studime për të konfirmuar gjetjet dhe për të parë nëse testi funksionon në një grup më të gjerë pacientësh.
Dr. Charles Shepherd, këshilltar mjekësor i ME Association, u shpreh:
“Këto rezultate, që përdorin profilizimin epigjenetik, përbëjnë një hap të rëndësishëm në kërkimin e një testi diagnostik për ME/CFS. Por duhet të dimë nëse ky ndryshim është i pranishëm që në fazat e hershme të sëmundjes, si dhe në rastet me forma më të lehta apo të moderuara. Po ashtu, duhet të sigurohemi që kjo veçori nuk shfaqet edhe te sëmundje të tjera inflamatore apo autoimune që kanë simptoma të ngjashme.”
Ndërsa Prof. Chris Ponting, nga Universiteti i Edinburgut, paralajmëroi se disa nga pretendimet e studiuesve janë “të parakohshme”.
“Ky test duhet të vërtetohet plotësisht në studime më të mirëkrijuara dhe të pavarura përpara se të përdoret klinikisht. Edhe nëse vërtetohet, ai do të jetë i kushtueshëm, rreth 1,000 paund për test,” tha ai.
