Puna nga shtëpia ka shumë benefite: shmangni udhëtimin, të bëni takime nga divani dhe të rrini me tuta. Por, mund të jetë më e vështirë të përqëndroheni dhe të ruani një ekuilibër punë-jetë kur shtëpia bëhet zyra juaj.
Ndërsa kërkimet tregojnë se shumica e njerëzve preferojnë punën në distancë krahasuar me atë fizike, kalimi nga zyra në shtëpi ka shkaktuar sfida të reja e të vazhdueshme, që kanë ulur produktivitetin dhe madje ju kanë krijuar gjendjen e një “burnout”.
HighSpeedInternet.com anketoi 1000 punëtorë amerikanë në dhjetor dhe 77% raportuan se janë ndjerë joproduktivë gjatë punës nga shtëpia. Hulumtimi nga Eagle Hill Consulting, i botuar në nëntor tregon se më shumë se gjysma e punonjësve në SHBA po përjetojnë burnout, me gratë dhe punëtorët më të rinj që raportojnë nivelet më të larta të stresit.
Ka disa gabime të zakonshme që bëni në rutinat tuaja të punës në distancë, të cilat “ju humbin kohën” dhe mund të përkeqësojnë burnout, thotë për CNBC Make It Anna Dearmon Kornick, trajnere e menaxhimit të kohës dhe drejtuese e komunitetit në Clockwise, një platformë kalendarike në internet.
Këtu janë tre zakonet kryesore të humbjes së kohës dhe si t’i shmangni ato:
U përgjigjeni email-ve menjëherë
Nëse po punoni nga shtëpia, komunikimi juaj mund të bëhet online, qoftë përmes emailit, Slack ose një platformë tjetër. Mund të ndiheni produktiv duke iu përgjigjur mesazheve sapo mbërrijnë në inbox-in tuaj, por po vidhni kohë nga puna më e rëndësishme.
“Kur u përgjigjeni emaileve kur ato vijnë, dita juaj bëhet tepër e fragmentuar dhe nuk do të keni hapësirën në dispozicion për t’u përqëndruar në punën aktuale që duhet të bëni,” shpjegon Kornick.
Në vend të kësaj, Kornick rekomandon caktimin e tre “blloqeve të kohës së vëzhgimit” 30-minutëshe për të kontrolluar mesazhet tuaja gjatë punës. “Duke vendosur një kohë rreth komunikimeve tuaja në internet, emailet nuk do të zgjasin dhe nuk do të pushtojnë çdo minutë të ditës suaj,” shton ajo.
“Ndiqni gjërat e shndritshme”
Një nga gjërat më të fshehta që harxhon kohën është të kapeni në “punë të zënë”: detyra të reja që dalin gjatë ditës ose gjëra të vogla veprimi në listën tuaj të detyrave që mund t’ju bëjnë të ndiheni produktiv, por t’ju largojnë nga puna më e rëndësishme.
Psikologët e quajnë këtë fenomen “sindroma e objekteve të shndritshme”, e cila përshkruan zakonin e shpërqëndrimit nga çdo gjë që është e re ose emocionuese.
“Përmbushja e shumë gjërave të vogla na jep dopaminë, gjë që na bën të ndihemi mirë derisa të kuptojmë se e kemi zvarritur punën tonë me prioritet më të lartë, duke ndjekur gjërat me shkëlqim”, thotë Kornick.
Ajo vazhdon: “Ju mund të këmbëngulni për t’u fokusuar, por krejt papritur ju kujtohet se ju ka mbaruar letra higjienike, kështu që shkoni për të porositur pak letër higjienike dhe më pas ju kujtohet se ditëlindja e nënës suaj po vjen, kështu që ju i porosisni asaj një dhuratë. Në fund, keni bërë kaq shumë detyra të vogla që ju kanë ardhur në kokë dhe e keni humbur dritaren e fokusit përpara mbledhjes tuaj të ardhshme.”
Ja si ta luftoni këtë: Rishikoni listën tuaj të detyrave në mëngjes dhe zgjidhni tre gjërat kryesore që duhet të arrini. Më pas, krijoni blloqe kohore në orarin tuaj të dedikuara për secilin prej tyre për t’ju ndihmuar të qëndroni të fokusuar. Ruani detyrat më të vogla, pasi të keni eliminuar të paktën një nga tre më prioritaret, thotë Kornick.
Lëvizja nëpër mediat sociale
OfficeNeedle pyeti më shumë se 600 punonjës në distancë se cili është shpërqëndrimi i tyre më i madh kur punojnë nga shtëpia dhe 56% thanë telefonin e tyre. Të gjithë kemi qenë atje: ngrihesh nga tavolina për pesë minuta për të kontrolluar telefonin, më pas kalojnë 30 minuta dhe ke rënë në një vorbull të TikTok.
Fikja e njoftimeve dhe vendosja e telefonit në një dhomë tjetër mund të ndihmojë në frenimin e tundimit për të kontrolluar aplikacionet tuaja. Nëse kjo nuk është e mundur dhe ju duhet të jeni pranë pajisjes tuaj personale, Kornick rekomandon të eksperimentoni me një “kohëmatës pa telefon” për t’i dhënë vetes pushime pa shpërqëndrim për të bërë përparim në projekte më të vështira.
“Vendosni një kohëmatës për 20-30 minuta dhe kontrolloni telefonin tuaj vetëm kur kohëmatësi fiket,” thotë ajo. “Këto shpërqëndrime nuk do të zhduken së shpejti, por ne mund të mësojmë të vendosim kufij dhe të bëjmë çmos për t’u përqëndruar në punë.”
