Dita e Mendimit Pozitiv, 13 shtatori është një kujtesë e vlefshme për rëndësinë që ka pozitiviteti në jetën e përditshme. Edhe pse nuk kemi nevojë për një ditë të caktuar për të vlerësuar fuqinë e mendimit pozitiv, shpesh kujtesat e tilla na ndihmojnë të rikthejmë fokusin tek forca e brendshme. Të gjithë përballemi me sfida, dhe nuk është e lehtë të mbetesh pozitiv në çdo rrethanë, por ushtrimi i “aftësive të pozitivitetit” mund të ndihmojë për të mos mbijetuar thjesht, por për të lulëzuar.
Bazuar në përvojën profesionale dhe personale si mjeke dhe kërkuese, Dr. Laura Gabayan (Los Angeles, CA) ndan katër mënyra kryesore për të forcuar mendimin pozitiv. Artikulli i saj është botuar fillimisht në Psychology Today.
1. Mbaj shpresën se gjërat do të rregullohen
Sipas Dr. Gabayan, shpresa është thelbësore edhe kur mënyra se si do të ndodhin gjërat mbetet e paqartë. Besimi që situata do të përmirësohet, pavarësisht mungesës së një plani konkret, mund ta bëjë përballimin e sfidave më të lehtë. Ajo sjell si shembull përvojën personale pas humbjes së shtëpisë në zjarrin Palisades Fire, kur pavarësisht shkatërrimit material, shpresa i dha forcë familjes së saj të rifillonte jetën në një zonë të re.
2. Shiko anën e mirë çdo ditë
Të shohësh anën e ndritshme nuk është gjithmonë e lehtë, por është një praktikë e vlefshme. Dr. Gabayan thekson rëndësinë e mirënjohjes dhe të fokusimit tek gjërat që kemi, jo vetëm tek humbjet. Edhe në rastin e humbjes së shtëpisë, ajo thekson se më e rëndësishme ishte që familja mbeti e sigurt dhe e paprekur nga fatkeqësia.
3. Beso tek vetja për të kapërcyer sfidat
Një tjetër element i mendimit pozitiv është aftësia për të parë veten si më të fortë se çdo pengesë. Në vend të pyetjes “Pse unë?”, Dr. Gabayan sugjeron qasjen “Pse jo unë?”, duke e parë sfidën si një test që forcon karakterin. Përvoja e saj personale me problemet shëndetësore e bëri të kuptonte se neglizhimi i mirëqenies personale kishte pasoja, ndaj vendosi t’i jepte përparësi qetësisë dhe gëzimit të përditshëm – gjë që, përveçse sjell ndjesi të mira, ndihmon edhe biologjikisht nëpërmjet hormoneve pozitive.
4. Prano emocionet negative dhe shprehi ndjenjat
Pozitiviteti nuk do të thotë të jesh i gëzuar në çdo moment. Emocionet negative janë pjesë e natyrshme e jetës njerëzore. Dr. Gabayan i krahason ato me “burime energjie që duhen adresuar”. Pranimi dhe shprehja e ndjenjave është mënyra më e shëndetshme për të kaluar përtej tyre, pa i lejuar të kontrollojnë jetën tonë.
Pozitiviteti si pjesë e urtësisë jetësore
Në librin e saj Common Wisdom: 8 Scientific Elements of a Meaningful Life, Dr. Gabayan ka përcaktuar shkencërisht “urtësinë” si një bashkësi prej tetë aftësish jetësore. Sipas saj, pozitiviteti është elementi i tretë më i rëndësishëm, pas qëndrueshmërisë dhe shpresës. Ai është i domosdoshëm për të jetuar me kuptim dhe për të besuar në një të ardhme më të mirë.
PsychologyToday nga Dr. Laura Gabayan është mjeke, shkencëtare, kërkuese dhe autore nga Los Anxhelos. Ajo ka themeluar The Wisdom Research Project, përmes të cilit ka zhvilluar edhe testin online New Wisdom IQ Test. Libri dhe kërkimet e saj kanë tërhequr vëmendjen e mediave të njohura si FOX News, ABC, KTLA, The Jewish Journal dhe revista e portale të tjera ndërkombëtare.
